Sefydlwyd Cyfeillion Croesor yn 1998 fel mudiad cymdeithasol i wella diwylliant, economi ac amgylchfyd Cwm Croesor ac ardal Llanfrothen. 

Yn 2000 agorwyd siop pethau ail law, Siop Mela ym Mhenrhyndeudraeth, er mwyn codi arian at achosion lleol ac i gefnogi’r mudiad. 

Yn 2001 prynwyd adeiladau fferm Bryn Gelynnen er mwyn eu haddasu at ddefnydd y gymuned. Erbyn 2007 roedd Caffi Croesor a’r toiledau wedi eu hagor ac ymhellach ymlaen yn 2008 agorwyd yr Oriel. Erbyn hyn, mae'r adeiladau'n ffurfio hwb gymunedol fywiog o fewn ein pentref bach gwledig, o'r enw Hwb Croesor. Mae Hwb Croesor yn cynnwys caffi, oriel gelf, siop ail-lenwi, gardd cymunedol, busnes seidr lleol Tirlais a sawna newydd sbon, Sawna Gardd.

Mae llawer o brosiectau yn digwydd yma gyda help gwirfoddolwyr Hwb Croesor, sydd hefyd yn cadw trefn ar yr ardd gymunedol ac yn cydlynu digwyddiadau codi arian. Mae Cyfeillion Croesor yn ddibynnol iawn ar wirfoddolwyr er mwyn galluogi ni i gynnal ein hwb gymunedol, ac mae ein cyfleoedd am incwm yn gyfyngedig. 

Rhwng 2024-2025 yn unig, llwyddom i gael dros £100,000 drwy gyllid grant, aeth i gyd yn ôl i'r economi leol drwy ddigwyddiadau cymunedol, prosiectau, datblygiadau i'r adeiladau a'r tir o amgylch Hwb Croesor a'n twf fel menter gymdeithasol.

Mae Cyfeillion Croesor yn falch o gyd-weithio gyda menterau eraill yr ardal fel Menter y Ring, Plas Brondanw, Y Dref Werdd, Siop Mela, Cwmni Bro Ffestiniog, Deudraeth Cyf a Cyngor Llanfrothen.